تحدي الـ 29 يوم - اليوم الاخير #29

مرحبا 

انا مصطفى العنزي 

بلبدايه احس بيه مشكله اني احب اتعلم كلشي بسرعه بدون حدود يعني جنت احس نفسي منبوذ بسبب هيج شي واستمرت هاي الاوضاع وياي لحد مااجه يوم شفت تحدي الـ 29 كلت اشارك لان احب اتعلم مهاره جديده شاركت ودخلت بلتحدي التقيت بناس عرفت انو اني مابيه مشكله هاي طبيعه الانسان والانسان لازم يتعلم ويحب يتعلم بس اكو ناس لاتستغل الموضوع او الغريزه الي بيها .

اختاريت اتعلم اللغه الانكليزيه لانها المفتاح لاغلب الاشياء بلدنيا مثلا تقديم على وضيفه او مقابله عمل وتفتح لك افاق وفرص عمل اكثر .

بديت ادرس القواعد وابسطها وكلشي تمام مشى وياي وبعدها بلشت اقراء مفردات وادخلها بجمله شفت الموضوع حلو مفيد بعدها دخلت استخدم تطبيق " دولنقو " هم جان كلش مفيد وعلمني اشياء جنت مااعرفها ولا ماره عليه ابد بعدها تعرفت على اصدقاء اجانب وحجيت وياهم دردشه واني من رواد الالعاب عرفت هوايه اجانب بالألعاب وحجيت وياهم وتعلمت شغلات جديده وكلمات مختصره تسهل الكلام وتعرفت على ثقافتهم ومجتمعهم اكثر واكثر وهذه الشي يشدني اتعلم انكليزيه بزياده .

الحافز الي جان يشجعني حتى استمر اقراء واتعلم همه الشباب الي اعتبرهم اكثر من كونهم زملاء تحدي بلعكس احس الي وياي عائلتي الثانيه يعني اغيب يسئلوني ويشجعوني بكل مدونه انزلها ويتعلمون وياي .

بيومي وقت فراغ كلش هوايه قررت اخصص للتعلم ٤ ساعات يوميا اني كل يوم اجيب اوراقي ادون عليها ملاحظات الي تمر عليه وافتح اليوتيوب اكمل الكورس الي داخله الي هوه من قناة " زي امريكان " ادرس اشوف الفيديو وارجع اشوفه مره ثانيه واسجل ملاحظاتي عنه هاي طريقه للدرسه كلش مفيده وسهله وخاصه الانكليزي ممتع من ضمن الكورس اتعلم سمع ونطق واللغه الدارجه بلشوارع الامريكيه وصراحه تعلمت هوايه .

وبختام المدونه والتحدي احب اكون ممتن

اولاً لصاحب التحدي مرتضى التميمي لانه فتح الفرصه الي ولباقي الشباب التعلم وماقصر لا بجائزه ولا بدعم معنوي وهوه شخص مامجبور يسوي هيج بس يريد الشباب تستفاد

ثانياً لفريق التحدي كانو كلش ودودين وكل مشكله تواجهني اطرحها مايقصرون بيها من مصادر وحل مشاكل والى اخره 

ثالثاً كلش ممتن للمشاركين بالتحدي وياي جان شرف الي اتعرف على ناس تحب تطور نفسها وتستمر بالتعلم  واكتساب المهارات الجديده ان شاء الله بالمستقبل اشوفهم بمراتب عاليه 

رابعاً واخيراً انا ممتن لنفسي لاني اختلفت عن باقي الناس حبيت اتعلم وتعلمت وحبيت اغير من نفسي وغيرت اني خلال هذه التحدي غيرت حياتي ١٠٠٪؜  انا كل اسبوع اقراء كتاب جديد واتعلم منه المفيد وامارس الرياضه ثلاث مرات بالأسبوع وانام مبكر وأقعد مبكر ويقولون ختامها مسك كلش كلش كلش شكراً الى ريهام العاني و افنان الراوي حفزني وفادني بترك التدخين ريهام علمتني طريقه لترك التدخين وانا مستمر عليه لحد الان وجاي اشوف فرق بيه .

وشكراً لكم جميعاً

صديقكم مصطفى العنزي ©